Universis præsentes litteras inspecturis, Stephanus, decanus Ledonis, salutem in Domino. Universitati vestræ præsentium insinuacione notum facimus, quod domina Helisabet de Montemoret, relicta domni Renaudi Senebrum, et Girardus, filius ejus, donacione inter vivos dederunt ac juramento de non contraveniendo interposito liberaliter concesserunt quamdam vineam suam sitam sub vinea Alardi monachi ecclesiæ Cluniacensi, et de eadem vinea eandem ecclesiam corporaliter investiverunt. In cujus rei testimonium, ad instanciam dictæ Helisabet et Girardi prænominati, sigillum nostrum præsentibus litteris duximus apponendum. Actum anno gratiæ M^o CC^o XXX^o septimo.